25 Jun, K. Kinabalu – Kerajaan Malaysia bahauu ani ngumum akan supaya akta yang berkaitan dengan hukuman pengendali skim cepat kaya diubah supaya penganjur yang mbuat skim ani disebat (kana hacut) sebagai hukuman.
Hukuman ani kan kana laksanakan pasal makin banyak sudah dangan yang kana tipu oleh skim ani daii biani. Yang melabur tunggang langgang, aah jalan melabur tu sanang linang macam Pak Man Telo biani. Kana tangkap; tapi usin ulihnya labih daii RM70 juta…! KOL berharap supaya oang oang dii jaan tah tuut tuutan aah skim yang inda bafaedah ani.
Mun nuut kajian kami, ada banyak gaya yang dapat dikelaskan sebagai skim cepat kaya ani, bukan pasal melabur nganya. Sekali ani KOL bapadahkan sabuting gaya yang paling popular skim cepat kaya. Iinda dangan baapa tapasaii yang ani ni skim capat kaya. Ani tah pengalaman dan ulasan sawang oang kita yang masaii jadi palui tuut aah skim yang inda bapaidah ani.
Makai indung usin (ibu duit)
1.1 Modus operandinya macam ani
Ada sawang yang jadi guru ( kepala Penyamun tah tu bah). Guru ani tah yang kana ucap pandai malagau usin. Basia ani sikapnya bukan oang sini.
Jadi mana mana jalama yang kan kaya tapaksa tah ngooda (jemput) oang ani, tambangnya di baaii, hotelnya dibaaii sama makan ditanggung, koleksin , sama sama nanggung guru ani sampai tia datang aah basia, sampai ya mulih samaada usin datang atau inda..
1.2 Alum cukup jan atu
Sabalum datang mesti ada persediaan pulang. Mesti ada penyeri, barang barang yang “istimewa” – of a rare species yang dihimpun kan supaya lagauan guru atu menjadi. Macam macam tia barang yang inda masuk akal yang disuuh mahimpunkan, tamasuk tajau lama, paiyuk mulanya, usin jipun, tanduk kaabau balaa, usin 10 sen 1971, (ani usin mana lah kan ada, pasal kerajaan Malaysia inda mencatak usin siling 10 sen pada tahun 1971), tikaa…. basia ni tapaksa pusing kaliling bang lubuk bang antau malihat mana mana aah yang ada.
Kala kala baatus inggit usin mbali barang barang ani. Yang untung atu tah siapa yang ada barang tauhan macam ani ani. Apa inda untung mun paiyuk mulanya yang sudah sumbing, bubus pun sanggup kana bali sampai RM3,000. Paiyuuk macam atu mun dijual timbang pun bahauu 30 sen sakilo. Kan jalan mahantak akan nasi pun inda lagi dapat…paling paling jalan nauh lauk masin nganya.
1.3 Sudah guru atu datang….
Samuha lagi mbai usin, mahimpun akan usin contohnya RM1,000 sawang. Gunanya kan jadi pamundul. Jadi, usin yan kana jadi akan pemundul ani mun ada 10 oang tuut kan mundul sudah RM10,000.
Sampai guru tia sudah. Barang barang pun sudah ada, usin pun sudah dihimpun akan, ada tia gayanya lagi yang lain. Ada yang kana puasa sunat, ada yang kana mandii, ada yang kana suuh puasa inda makan nasi, ada tia yang inda kana suuh makan sia; sama ada tiga haii, tujuh haii ampat balas haii. Guru tu tinggal la di hotel, paling kuang tinggal di umah kepala pamundul, dilayan macam aaja. Maklum tah, oang yang mendatangkan tuah konon. Sikapnya ia inda kan baamal macam pamundul pamundul atu, pasal uja nya yang guna usin bukan ia . Yang gunalah yang masti puasa, baamal, bnaa jua kan...
1.4 Sampai masa yang dinantikan
Malam yang dinantikan, samaada di umah, surau lama, junjung yang inda bajalama…bahimpun tia saudagar mimpi jan pamundul (kami tah tu bah). Barang dihimpun akan, usin ditukup jan kain atau tikaa, siap jan ngambii wudhu, samuha pamundul bahimpun. Antaii siang puasa…ada yang kakal baik asanya makan, makanan pun alum usai masuk ka paut.
1.5 Klimaks
Uja guru, syaratnya hati masti bersih, jaan tamahaa. Jaan putus wirid, zikir, jaan putus aing sembahyang. Dai pohon malamaii sampai tia ka tangah malam, Kamayan pun tabun tabun asapnya….. usin yang kana tukup bagagaa…..kain kuamut kuamut. Usin! ! usin! Usin datang!!!!!!!!!!!
Lapas samuha yang penuh suspen tu, tambah lagi kepayahan puasa…duduk pun antuk antuk. Kemungkinan untuk salah seorang pemundul ani mbuat silap memang tinggi. Pamundul mangantuk, tambah lagi jan asap kemayan, tambah lagi lapas puasa, paut balum mampat, masti kan bakantut.
Lapas pukul 12 si Kamal talalap, si Umbat paning sasak napas nahan kan bau kamayan. Si Amat apa lagi talihat kuamut kuamut sudah panutup usin yang dijadikan pundul atu. Sapuluh iibuu tu…uja si Amat dalam hati. Mun ku inda salah dangaa antaii uja guru; saibu boleh jadi RM100,000.00 Mbali kaita, mbali tv, baiki umah,, kawin ku lagi sawang baik ni, Uja Siamat dalam hati.
Sadang sadang samuha jan halnya masing masing…. PUUUUUUUUUUUTTTTTTT!!!!!!!!!!!!!!! Nah bakantut tia si Kalam. Bapangaii bunyinya…cukup jan bau bau macam kaduau.
Guru taus ba kuitik, “Wahh, udahhhhh, bubar lagi ini malem. Saya kan udah bilang bapak semua ngak bisa bikin onar gini. Yahhh….kalian liat ini bawah kain, uang kalian juga ilang lagi gara gara tidak ikut aturan. Sepatutnya ini malam perfect dong yah. Kita juga sama sama liat itu uang udah dateng”
Kilaa!, jan usin usin lasap.
1.6 Ahh, nggak apa apa, bisa coba lagi
Atu tia jadinya bilang kali kami mundul usin. Kuang labih 3 tahun ku tuut tuutan ani, inda cukup daii Indonesia, daii Palipin kami odaa. Inda cukup dai Palipin, dai Semananjung kami odaa. Samua guru yang hebat hebat di dalam malagau usin.
Yang labih hibat, barang yang diminta lain lain, sakajap paiyuk, sekajap usin, sekajap tabung, sampai bubu mulanya, quran buuk, tampuung abis kami angkut.
Kumpulan kami ani kala kala mikin banyak, daii 8 oang sampai ka 15 oang. Biasanya yang usin kan pamunq dul tu inda tatap, tapii andah andahpun RM500 ada yang sampai RM5,000 nuut kamampuan sama nuut baapa banyaak usin yang digunaii. (Mun kana kana… uja dangan RM1,000 boleh jadi RM100,000……… bukannya inda banyak tu liau!)
Tapi ani alum cukup jan balanja bakongsi mbali barang istimewa sama balanja ngodaa guru ani. Kuang labih bilangkali sawang mau jua ngaluaa akan RM300 sebagai tambahan ngodaa belanja tambang sagala sama mbali barang lama supaya mangasi, usin datang.
Dalam 3 tahun ada 7 kali kami mundul. Kan bilang kali usin yang kana tukup kuamut kuamut, sakali tu usin tu kana tauh di bawah tikaa bagagaa pisinnya. TAPI ADA TIA NGANYA SALAHNYA, JADI USIN INDA MASAII DATANG. Aku saja balanja ku inda kuang dai RM10,000. Ani kakal baik mun dibandingkan sama si Kalam kawan kami yang takantut atu. Ia kuang labih RM40,000 kan abis usin EPF nya yang sudah kaluaa. Si Amat bakalahi laki bini pasal abis sagala galang bininya dijual, tanahnya pun digadaiakannya.
Sudah batah tu langu ku jua mbubut mimpi kan jadi jutawan yang inda pandai datang. Sadaa laa jua. Sabuting nganya yang alum ku pasti, apa katah gayanya mbaii kuamut kuamut usin di bawah kain atu. Tapi ada ampat buting yang ku paham kaangani:
1) Usin yang kununnya hilang tu memang kana ambil, bukan giin yang ngambil, tapi paasaanku guru yang hantap pandai atu.
2) Kedua adaa aja yang nda ngam bilangkali muja/ mundul usin tu. Tapi sudah ku pikie akan kaangani, apa jua gayanya kan ngam, kana suuh puasa aii siang, bajaga ai malam, lapas tu mangantuk inda dapat, bakantut inda dapat. Aii siang sudah tah kaduuk kaduuk paut inda baisi, tapi sudah makan angin paut kana mampat akan baisi masti jua angin kan kaluaa.
3) Niat yang inda bik kunun. Ani tah alasan guru yang paling sanang dibuat. Cuba pikie akan, siapa yang inda baaniat mun sudah kuamut kuamut usin kan datang….
4) Yang untung guru, yang palui kami. Baik pulang mahat.
KOL
END
No comments:
Post a Comment