Ingat tak dengan perbincangan mengenai asal usul kedayan pada vol lepas antara lain menerangkan kaitan di antara bahasa Banjar dengan bahasa Kedayan. Seorang pembaca telah mengirimkan satu cerita yang beliau perolehi dari internet untuk tatapan dan penilaian para pembaca KOL.
Si Dayuhan wan Si Gantingan
Dikisahkan semula : Mohammad Azlan Ali Bashah
Bahari di banua Banjar, di pingar hutan jauh wan rumah urang, diam baampat baranak, si uma wan tiga anaknya. Dua ikung anak babini pantar daraan, nang kaka ngarannya si Gantingan nang ading si Dayuhan. Anak nang pahalusnya lalaki, umur tiga bulan rahat pandai ba ?uku. Nang ayah tulak madam kada tahu ka mana, parak satahun kada sing mantukan/bulik.
Jadi nang Uma ni pang bagawi ka bandang, malunta bacari iwak, ka hutan mancari lalapan cagar ditaruk. Si Gantingan ni lantih urangnya baimpuan ading nang halus tadi, mamasak, tatapas wan basasimpun di rumah. Si Dayuhan ni pulang wangal, tagak budu-buduan, kada hingkat disuruh, lain nang dipadahkan lain nang diulah.
Katuhukan begawi nang Uma ni tadi limbah am garing. Kamarian nang Uma baucap. ?Gantingan, awak ku ni uyoh bangat, kapala minek, handak bangkit gin aku kada hingkat. Padi di bandang tu masak, bisa ai hungku ripo sudah, amun kada dikatam ya am raput inya?.
Si Gantingan bamandak marista nireng nang uma lalu bailun. ?Mara ai uma barihat, hari ini tahan kada uma ka bandang, bisa ai kina ulun mangatam padi. Tangah hari ulun bulik ai pulang memasak di rumah?.
Sabalum tulak ka bandang si Gantingan nyaru si Dayuhan. ?Oo Dayuhan aku handak ka bandang mangatam, ikam diam ai di rumah menjaga uma wan ading. Kina tanggar banyu hangat, amun sudah mangalagak, kambuhi wan banyu dinginkan...ikam japai hulu, bia-bia ladar mandii ai uma. Kaluku mau sigar awak limbah mandi lakas ampih garingnya?.
?Inggih ai ? ujar Dayuhan, baparagah maharati, tangan kiwa mahahar kuring di kapala, kajadian kabanyakan bakutu, rambut kusut malarak kada suah disuroi.
?Sabuting lagi, didik nanang halus sudah ku silihi lampinnya, sudah ku peringkani jua, kina ikam pukung, guringkan inya. Amun inya manangis, japai bumbungannya, amun balibak, ngintu tandanya inya sakit parut. Ambil minyak agas kacaki wan bawang saikit, kasai di parutnya. Amun ading sudah guring, andaki tambakau di bumbungannya pina tugul kina inya guring?. Maharatikah kau?. ujar Gantingan maiitihi. ?Maharati ai ?. Jawab Dayuhan, takarinyum, tampayan ai gigi di hadap nang rungkang.
Gantingan mambujurakan kutung wan tanggui nang dipakainya sambil tu bapasan pulang. ?Patang kina aku handak maulah wadai balungan hayam, baras lakatan (pulut) sudah ai ku randam. Kina bila matahari naik higa banturan ikam tumbuk tapung pulut tu lah?. ?Hiih ? ujar Dayuhan, sambil kiruh-kiruh bagaru kagatalan kurap di tampaha.
Aku handak tulak dah ni, kau ingatakan panya nang aku madahi tadi ujar Gantingan mamasani sakali lagi. Tapih disingsing tinggi, hancap si Gantingan bajalan sambil nginting kampil nang baisi sanguan wadai wan banyu taharian ka bandang.
Limbah Gantingan tulak ka bandang, si Dayuhan gin mahidupi api di atang, mananggar kuantan ganal, menjarang banyu hanyat gasan mamandii nang uma. Bila banyu sudah mangalagak, Dayuhan manggarak umanya. ?Oo ma, bangkit, ambil talasan nih, basilih. Duduk di lantai jarang tu, ulun handak mangubuyi banyu hangat. Ujar Gantingan tadi lakas sigar awak amun mandi
banyu hangat?. Nang uma gin basilih makai talasan lalu badangkak di lantai jarang mahadangi si Dayuhan mamandii.
Si Dayuhan mamajahi api, maangkat kuantan baiisi banyu hangat, lalu diandak higa nang uma. Kajadian palui banar si Dayuhan inya kalupanan akan pasan si Gantingan. Banyu hangat tadi kada dikambuhinya wan banyu dingin. Inya gin tarus haja mangubuyi banyu sahangatan ka awak nang uma. Napa bakuciak pang nang uma kada bisa madahkan lagi kahangatan, luyut awak saikungan. Taga dasar budunya(palui) si Dayuhan, makin umanya bakuciak makin bahimat inya mangubuyi banyu. Umanya kasakitan dipadahakannya kaaraian. Talah mandi, habis takuyak kelibir umanya, mata tabulaning, muntung tanganga, ilat tajulur. Siksa banar nang uma mati ilah Masitah nang dicaburkan Firaun ka banyu hangat. Asaan Dayuhan umanya kasadapan mandi, lalu taguring.
Disilihinya pakaian umanya lalu diangkat ka kasur.
Limbah itu, Dayuhan mamukung pulang adingnya diayunan handak manguringakan. Dayuhan taganangan pasanan si Gantingan lalu menjapai bumbungan adingnya. ?Wah sakit parut kanak ngini, balibak bumbungannya? ujar Dayuhan. Dayuhan gin maambil panjar (baji) lalu dicucukakannya ka bumbungan adingnya, napa.........mancurat ai darah kaluar, kapati pang adingnya manangis maarit kasakitan langsung ranai kada sing bagarakan lagi. Takuriheng si
Dayuhan lalu baucap, ?Han napa bujur jua ujar si Gantingan tadi, amun diandaki panjar dibumbungan janak banar ading guring, ilun bahinak gin kada kadangaran lagi. Amun si Gantingan bulik kaina tantu inya mamuji aku pasal bisa babanar manjaga uma wan baimpuan mangguringakan ading?.
Si Dayuhan nyanguk di lalungkang, takarumus muhanya nireng matahari nang sudah di atas bumbungan. Badadas inya maangkat lasung wan halu lalu dinaikakan ka atas banturan. Dayuhan gin mulai manumbuk tapung....dabuk..dabuk. Balum sawat sapuluh kali manumbuk....bummmmmmmmmmmm limbaham runtuh bumbungan. Lasung tabalik, halu takalapasan takipai, baras wan tapung tahamburan. Dayuhan tabalik pungkang, mandabuk gugur ka lantai langsung tambus ka tanah.....siuppppppp.
Tangah hari (siang) hangat mangingeng, Gantingan bulik ka rumah handak memasak, awak limbui bapaluh, hingal-hingal behinak kauyuhan bagawi wan jauh bajalan. Di atas kapala bajujungan bakul seganalan, hibak panuh bajubung wan gamai padi nang dikatam. Jadi Gantingan kada kawa handak batunga atawa mengilar ka higa kiwa wan kanan. Sapai haja di muhara lawang, umbai ai inya bahalulung, basasaru minta ganii manurunakan bakul nang dijujung. ?Ooo Dayuhan!!! lakasi ganiii aku nih?. Tuhuk jua ....upal....basasaru hanyar si Dayuhan ilan dari siup tarus manyingaiyi wan mangganii manurunakan bakul.
Takipek banar si Gantingan manireng rumah runtuh, tarus manakuni si Dayuhan. ?Dayuhan! Panya ulah ikam pina runtuh rakai sasakali rumah kita?
Gelidikan awak Dayuhan mengatar lalu bagamat menjawab. ? ikam nang manyuruh aku manumbuk tapung di atas banturan pagi tadi. Aku turuti ai, sakalinya runtuh?. ?Budu banar ikam ni Dayuhan ai, ujar ku matahari tinggi parak banturan, kedada aku manyuruh ikam manumbuk tapung di atas banturan, suah kah urang manumbuk tapung di atas banturan atawa bumbungan ?? si Gantingan membihau garingitan.
?Mana uma wan ading?? Gantingan manakuni pulang....
?Ada ai di atas, uma taguring limbah kaaraian aku mandii wan banyu hangat. Ading pulang kada sing ilanan limbah aku panjar bumbungannya kaya nang disuruh oleh ikam?. Jawab si Dayuhan ungah pasal pintar banar mambisai ading wan umanya.
?Bila aku nyuruh ikam mamanjar kapala ading? Ujarku diandaki tambakau bumbungannya. Uma ku suruh ikan mandii wan banyu ladar kada banyu hangat kada? Gantingan takajut, badadas bukah naik ka rumah malihati ading wan umanya.
Manireng adingnya badarahan, umanya karas kajung, mati kaduanya, bakuciak pang Gantingan ? ikam mamatii uma wan ading Dayuhan ai?. Uma kita kedada lagi ading gin mati jua?.
Mandangar si Gantingan bakiciak wan manangis garung-garung, hanyar Dayuhan tahu nang umanya wan adingnya mati. Napa Dayuhan umpat ai jua manangis bahimat, bapangsar sambil bahantak batis.
Gantingan manyasal babanar manyuruh si Dayuhan manjaga ading wan umanya. Inya tulak bahabar minta urang mauruskan jenazah uma wan adingnya.
Ada lagi sambungannya...................
Sudah parak samusim Uma Dayuhan wan Gantingan mati. Si Gantingan magun ai mahinam.
?Oo Dayuhan, aku kaganangan banar lawan aruah Uma. Malam esuk aku handak aruh ma?aruwahi Uma. Lauk wan segala lalapan sudah ku sadiaakan. Pagi Esuk ikam tulak ai basaruan manyuruh urang datangan. Kada kira sipa haja nang ikam tahaga di pajalanan saruani ai barataan.
Esoknya, pagi-pagi sudah ai Dayuhan bangkit lalu tulak basaruan. Si Gantingan di rumah basasimpun wan bamasak. Nasi sagaringsing, ampal dua macam, humbut nyiur dimasak gangan putih.
Si Dayuhan gin tulak basaruan. Di tangah jalan tahaga wan burung Pipit, lalu si Dayuhan baparagah ka Pipit pasal handak aruh ganal. Kaya ini ujarnya....!
? O........ Pipit, O..... Pipit,
?kami handak ba?aruhan?
?Saruanan lah barataan?
?Lalakian wan babinian?
?kada kira tuha atawa kakanakan?
?Bahajat mangumpulakan?
?Sunyaan bubuhan wan kakawalan?
?Matan hilir datang ka pahuluan?
?bilang sa?ikung kada kaliyungan?
?Malainkan tamasuk dalam hitungan?
Purrrrrr ......malibur si Pipit tarabang sambil bailun,
?pit.........pit........pit...............?.
Sarik banar Dayuhan mandangar Pipit manyambati rumahnya kipit.
?Rumah kami kada kipit kada Pipit ai?, ujar si Dayuhan.
Purrrrrrrrr ......malibur pipit tarabang.
Rigas-rigas Si Dayuhan bukah mangapung ma?iringakan burung Pipit lalu
manakuni si Pipit.
"Oooo Pipit....Oooo Pipit" !
"Iakam manginang kah"
"Manginang ai ujar Pipit".
"Oooo Pipit....Oooo Pipit" !
"napanya gasan sireh mu"?
"sireh ku sireh mangkarung", ujar Pipit.
"Oooo Pipit....Oooo Pipit !
"Napanya gasan kapur mu"?
"Kapur ku tahi burung", ujar Pipit.
"Oooo Pipit....Oooo Pipit !
"Napanya gasan pinang mu" ??
"pinang ku nyiur rahat karungkung", ujar Pipit.
"Oooo Pipit....Oooo Pipit !
"Napanya gasan gambirmu"
"gambir ku tahi hayam mantong", ujar Pipit.
Oooo Pipit....Oooo Pipit !
"Napanya gasan tambakau ruku mu"?
"Tambakau ruku ku sasingut jagong".
Oooo Pipit....Oooo Pipit !
"Di mana gerang rumah mu"
"Rumah ku di halapat puhon buluh walatong"
Talalu kajauhan ma?iringakan Pipit tarabang limbah am sasat Si Dayuhan ka dalam hutan. Si Dayuhan gin babulik handak bapatah balik ka rumah. Sakalinya tahaga wan rumah nang kada bisa lagi madahakan ganal wan tinggi-tingginya.
?Rumah sipa pang gerang nang ganal banar ini?, ujar Dayuhan basurah surangan. Sampai di muhara tangga lalu si Dayuhan basasaru.?Oooo urangnya! Adakah sampian di rumah ??. Dua talu kali basasaru ba?ilun ai tumatan surambi.
"Garabak garagoi"?
"Talapak kaya tanggoi"
"Burit kaya bakul"
Sakalinya mancungkung ai di muhara lawang sing ganalan hantu Raksasa,
sambil ba?ilun pulang.
"Garabak garagoi"?
"Talapak kaya tanggoi"
"Burit kaya bakul"?
?Napa hajat ikam ka mari ??ujar hantu Raksasa manakuni si Dayuhan.
?Kedada papa, cuma manyaruwani sampian ka rumah, kami handak bahawul malam
kaina?, ujar Dayuhan,
?Oooo kaya itulah, bulik ai ikam dahulu, malam kaina bisa ai aku manunta,i
, ujar hantu Raksasa.
Si Dayuhan gin bulik. Sampai di rumah si Gantingan gin manakuni. ?Sudahkah
ikam basaruan?
?Sudah ai, malam kaina datangan ai urangnya?, ujar si Dayuhan.
Bila ari patang sibuk ai si Gantingan wan si Dayuhan bakakawut, ba?idang hagan manyurungi urang makan malam kaina. Bila parak sanja, talah bakakawut, sakalinya tadangar ai tumatan jauh ba?ilun.
"Garabak garagoi"?
"Talapak kaya tanggoi"
"Burit kaya bakul"
Napaa...............takipek ai si Gantingan. ?Sipa nang ikam saruani, hantu Raksasa lah ? Maram ikam amun inya kada cukup kanyang ikam pang ditaguknya pulang.? mangatar ai si Gantingan dua ba?ading, kada hingkat baulah apa-apa
lagi.
?"Garabak garagoi"?
"Talapak kaya tanggoi"
"Burit kaya bakul"
Datang ai hantu Raksasa dua laki bini. Si Dayuhan wan si Gantingan manyunduk lawang piset-piset sambil ma?indap di lungkang manirengakan hantu Raksasa nang lingas-lingas makan. Sakali hadap jua talah nasi sagaringsing wan lauk-lauknya sakali. Rupanya magun jua kada mayo, cirat-cirat matanya mancari?i si Dayuhan wan si Gantingan sambil bahalulung.
?Oooo..............urangnya di mana ikam bapatak ? Adakah lagi nasi ?? Sambil kulilik-kulilik mamusingi rumah mancari?i kaluku ada makanan nang laen lagi. Lalu ba?ilun :
"Ting! Ting....ngiwit..... paaa..................ti..kok"?
"Aku ginting di burit, lalu............... ku tagok"?
?Ikam ai pulang ku tagok, ujar hantu Raksasa, lalu naik ka rumah mancari?i
si Gantingan wan si Dayuhan.
Bilang kada bisa madahakan lagi takunannya si Dayuhan. ?Oooooo Gantingan! Napa kita ?? Ujar Dayuhan gelidikan awak mangatar saikungan.
?Kita babuwut dalam ?belanai? bapatak, (belanai=guri ganal wadah pabarasan batudung tambaga) taga ikam daham bariuh lah, amun ikan bariuh tahuannya hantu Raksasa, mara matian kita dimakan inya kaina? ujar Gantingan.
?"Garabak garagoi"?
"Talapak kaya tanggoi"
"Burit kaya bakul"
"Ting ! Ting....ngiwit..... paaa.............ti..kok !!!!!!!!!!?"
"Aku ginting di burit, lalu............... ku tagok !!!!!!!!!!"
Tuhuk hantu Raksasa mancari?i si Gantingan wan si Dayuhan kada jua tahaga. Sakalinya ? boooooooooooooot.........? malibut si Dayuhan bakantut, limbah am pacah belanai. Badadas ai si Dayuhan wan si Gantingan tajun ka tanah, bukah di kapung pulang oleh hantu Raksasa. Bukah punya bukah tahaga puhon pinang, hancap ai si Dayuhan wan si Gantingan mamanjati puhon pinang datang
ka pucuknya. Kada kawa pulang hantu Raksasa handak manangkap.
Ba?ucap hantu Raksasa. ?Kaya apa ikam naik ka puhon pinang? ? ?Amun handak lakas sampai ka pucuk panjat ai burit ka atas?, ujar si Dayuhan.
Hantu Raksasa gin manuruti basa si Dayuhan, banaik puhon pinang burit ka atas. Napa tapayan ai lubang kalimut hantu Raksasa sing ganalan, lalu kalapauwan ai si Dayuhan wan si Gantingan manukuni wan buah pinang masuk ka kalimut hantu Raksasa.
Kada bisa madahakan lagi, bilang kalapak-kalapak ai hantu Raksasa kasakitan, panuh parut wan buah pinang lalu mati. Arai ai si Dayuhan wan si Gantingan pasal sudah salamatan, turun dari puhon pinang lalu bulikan ka rumah saurang.
Kada mada si Dayuhan, bungul-bungul inya kawa jua mamati'i hantu Raksasa.
KOL
END
No comments:
Post a Comment